Vrak/Uppolaiva

Itämeren pohjala oon mailmanynikki kulttuuriperintö. Se oon korkea aika nostaa esile nämät uppolaivat ja muut jäänökset uutheen musehoon. Vrakila/ Uppolaiva – Museum of Wrecks met halvaama antaa käviöile syväsukeluksen Itämeren salhaisuukshiin.

Vrak/Uppolaiva – Museum of Wrecks oon uusi mariniekolookinen museo joka tullee mahtumhaan olehvaan venehalhiin Vasamuseon vieressä, Djurgårdenilla Stokholmissa. Yhteys Itämerheen ja likisyys entisaijan merivoimatelakhaan ja uppolaihvoin tullee olheen luonoliseksi.

Museo joka aukassee 2020 kuuluu Vasamuseon, Merihistuurialisen museon, Marinimuseon ja Rautatiemuseon kansa valtiolisheen virasthoon Valtion maritiimi ja kuljetushistuurialisheen musehoon.

Suuri kulttuuriperintö

Itämeren erityinen miljöö ja histuuria merkittee ette aluheela oon ynikki määrä hyvin säilytettyjä uppolaivoja ja muita jäänöksiä eriltä aikaperiuutilta saman luokkasia ko se tunnettu laiva, Vasa. Se oon yks mailman enniiten trafikeeratuista meristä, ja se ynikki yhistelmä murtoveestä, kylmästä, pimeästä ja matalasta syyremäärästä Itämeressä tekkee ette materiaalin, puunki, mennee säilyttää kohta täyelisessä kunnossa.

Viimisinnä vuosina se tekninen kehitys ja uuenaikhainen mariniarkeolookinen tutkinto oon tuottanheet siiheen ette tieto tästä kulttuuriperinöstä oon kehittynny tramattisesti.

Näyttely ja muut kanalit

Vrak/Uppolaiva – Museum of Wrecks antaa uusia perspektiiviä histuuriasta ja nykyaijasta. Löyöitten ja tikitaalin tekniikan avula met halvaama näyttää ja kertoa niistä ihmisistä joilako meri oon ollu elantonna, vesikulkutienä, taistelualuheina - ja hautoina.

Tämä, ylheisölle tuntematon mailma tulhaan tekheen eläväksi monela innovatiivilä tavala näyttelyissä mutta kansa Vrakin/Uppolaivan webbisvula, joka oon tärkeä osa museosta. Ympäristömailman seuranan ja yhtheistöitten kautta muitten maitten kansa Itämeren ympäri, Vrak/Uppolaiva tullee olheen enämpi ko museorakenus - sie kohtaat meitä monessa eri kanalissa!